Uyaqhubeka umkhankaso omkhulu wamaphoyisa endaweni yasePoint, eThekwini, lapho kuhloswe khona ukubopha abantu bokufika abasolwa ngokuhlala eNingizimu Afrika ngokungemthetho.

Ngokwezikhulu, imigwaqo eminingi kule ndawo ivaliwe njengoba amaphoyisa enza umsebenzi wokumisa nokusesha abantu nezimoto. Izikhulu zoMnyango Wezasekhaya (Home Affairs) nazo zikhona ziqinisekisa ukuthi abantu bokufika abanqandwayo banazo yini izincwadi ezibavumela ukuba semthethweni kuleli.

Kubikwa ukuthi amabhizinisi amaningana avaliwe ngemuva kokuthi kutholakale ukuthi abanikazi bawo bebengenazo izimvume ezidingekayo zokuhweba noma bebeseNingizimu Afrika ngokungemthetho.

Amaphoyisa aphinde aqinisekisa ukuthi kukhona abantu asebeboshiwe ngamacala okutholakala nezidakamizwa ngesikhathi kuqhubeka lo mkhankaso.

Iziphathimandla zithi lo mkhankaso uyingxenye yemizamo ejwayelekile yokulwa nobugebengu nokugcina ukuphepha emphakathini. Ziphinde zathi lo msebenzi uza ngosuku olwandulela imibhikisho ehlelelwe umhla ka-30 Juni emayelana nokungena kwabantu kuleli ngokungemthetho, ngenhloso yokuqinisekisa ukuthi le mibhikisho iba nokuthula nokuphepha.